خطة 100 يوم لإنقاذ المبيعات — Clash Burger

القصة من البداية

مطعم Clash Burger في بنها كان بيمر بأزمة حقيقية: مبيعات بتنزل بشكل مخيف، تفاعل شبه معدوم على السوشيال ميديا، ومنافسة شرسة جداً في السوق وصلت لدرجة حرب أسعار. ده غير مشاكل داخلية في التشغيل زي ضعف خدمة الدليفري، وعدم استغلال قنوات مهمة زي تيك توك، وتأثير الظروف الاقتصادية وتغير ذوق العميل.

الوضع كان محتاج تدخل جراحي، مش مجرد "حملة إعلانية جديدة".

اللي عملته — خطة الـ 100 يوم للإنقاذ

بدل الحلول المؤقتة أو الترقيعية، بنيت وطبقت "خطة 100 يوم" شملت إعادة هيكلة تسويقية وتشغيلية متكاملة ركزت على 5 محاور:

1. بناء الميزة التنافسية (The Big Why)

السوق كان بيحرق أسعار، فكان لازم نلعب لعبة تانية. ركزنا على جودة المكونات، وابتكرنا منتجات جديدة تماماً زي (فتة كلاش والبوكس الجديد). وسلطنا الضوء على تفرد المطعم بكونه أحسن مكان بيقدم فرايد تشيكن في منطقته.

2. تطوير البنية التشغيلية والدليفري

التسويق ملوش لازمة لو التشغيل واقع. اشتغلت على تحسين خدمة التوصيل: حددنا مناطق التوصيل بدقة، سرّعنا الخدمة، عملنا عروض خاصة للدليفري، وحسّنا شكل التغليف (Packaging) عشان يوصل للعميل تجربة كاملة.

3. إدارة المحتوى والهوية البصرية

حطينا معايير احترافية للتصوير عشان العين بتاكل قبل الفم. بدأنا نصور الساندوتش مقطوع عشان نبين الحشو والمكونات، واستخدمنا زوايا تصوير بتبرز حجم المنتج. وخصصنا مساحة ديكور جوا المطبخ نفسه لإنتاج محتوى عالي الجودة ومستمر.

4. التجديد المستمر

عشان نحافظ على حماس العملاء ونخليهم يرجعوا دايماً، كان عندنا قاعدة: ابتكار منتج أو فكرة تسويقية جديدة كل شهر.

5. هندسة العمليات والتقييم المستمر

عشان نضمن إن الخطة ماشية صح، طبقنا نظام متابعة صارم: قياس أداء المبيعات كل 10 أيام، مع تقييم شامل وكامل كل 30 يوم عشان نعدل المسار لو لزم الأمر.

النتائج بعد 100 يوم

• قفزة في المبيعات: الإيرادات زادت من 120 ألف لأكتر من 300 ألف.
• توسع في قاعدة العملاء: عدد العملاء زاد من أقل من 350 لأكتر من 500 عميل، بمعدل احتفاظ (Retention) عالي جداً.
• كفاءة التشغيل: طلبات الدليفري زادت بنسبة 66%، وطلبات الصالة (Place orders) ارتفعت من 140 لـ 250 طلب وأكتر.
• نجاح المنتجات الجديدة: بيع أكتر من 300 قطعة من "كلاش بوكس" الجديد في وقت قياسي.
• السيطرة الرقمية: عدد متابعي إنستجرام تضاعف، وزيادة متابعين فيسبوك 150%، ومعدل الوصول (Reach) زاد 300%.
• التفاعل: لأول مرة كسرنا حاجز الـ 2,500 تفاعل على المنشورات، واستقبلنا 500 رسالة حقيقية.